Rusiye akimiyeti tarafından apiske alınğan qırımlı aq qorçalayıcı ve jurnilist İrına Danılovıç Avropa parlamentiniñ prezident muavini Pina Piçernoğa muracaat etip, Avropa toplulığınıñ diqqatını Rusiyeniñ Zelenokumsk şeerinde qadın koloniyasında olğan kütleviy işkencelerge celp etmege rica etti. Bu aqta Qırım.Aqiqat Danılovıçnıñ soy-sopları vastasınen yollağan beyanatına esaslanıp haber ete.
Danılovıç aytqanına köre, koloniyada natsist gestapo areketlerinen qıyaslağan usullar qullanıla. O, «izsiz işkence» qullanılğanını haber etti: gece-kündüz pek parlaq elektrik ışığı yana, gece-kündüz söndürilmey. «Közlerini baylasañ bile faydası yoq – qadınlarnıñ közleri, başı ağıra, yuqlap olamaylar», – dep aytıla muracaatta.
Bundan ğayrı, onıñ aytqanına köre, mabüsler akustik zorbalıqqa oğray: saba altından baraqlarda dinamikler eñ yüksek seviyede çalışa, bütün mabüsler çekişe. Danılovıçnıñ özü buña zornen dayana, onıñ qulaq şikâyetleri ve toqtamağan ağrısı bar.
Bundan evel o, bu koloniyada olğan diger işkenceler aqqında da tarif etken edi, ava şaraitlerine baqmadan, meydanda saatlarnen turuv – yağmur yağsa ya da suvuq olsa, em de zor sanitar-turmuş şaraitleri.
Muracaat Pina Piçernoğa yollandı, çünki o, Danılovıçnıñ «maneviy qorçalayıcısı» ola ve oña qoltutqanını bildirgen edi.
Olğanlar sebebinden aq qorçalayıcı işkence adiselerini aydınlatmağa rica etip, bu vaziyetke lâqayt qalmağan er kesni Rusiye insan aqları vekâletlisi Tatyana Moskalkovağa muracaat etmege çağıra.
2022 senesi qırımlı jurnalist ve aq qorçalayıcı İrına Danılovıçnı FSB hadimleri qaçırdılar. Daa soñra onı patlayıcı maddeler saqlağanında qabaatladılar, tahqiqat izolâtorında ise otit hastalığı sebebinden uzun müddet tibbiy yardım kösterilmedi. Neticede faalniñ bir qulağı eşitmey ve tedaviylenmey.
Keçken sene avgust ayında, koloniyada bulunğan soñ, Danılovıç qulaq ve baş ağrıları sebebinden tibbiy bölükke muracaat etti, amma ekim Lidiya Morozova, Danılovıç sağırlaşqan soñ, ağrı özü keçecek, dep ayttı.