Rusiye tarafından mahküm etilgen qırımtatar cemaat jurnalisti Remzi Bekirov qılğanı içün toqtamadan Rusiye Federatsiyasınıñ Abakan şeerindeki 33-ünci cezahanesiniñ ceza izolâtorında tutula. Bu aqta ZMINA onıñ tuvğanlarına aıtf etip bildire.
Yaqınlarınıñ aytqanına köre, cezahane memuriyeti Bekirovnı defalarca ŞİZO-ğa yollay ve diniy merasimlerni keçirgeninden sebep izolâtsiya müddetini uzata edi.
Qırım sakini mektüplerinde, sert apis şaraitlerinde çoq vaqıt keçirgenini, amma memuriyetniñ basqısı toqtatılmağanını bildire edi. Jurnalistniñ qorantası mahkemede bularnı temyiz etmege tırıştı, amma red cevabını aldı. Bundan ğayrı, Rusiye prokuraturasına, hususan, Hakasiyağa, ve Rusiye insan aqları vekâletlisine şikâyet etken ediler, amma cevap almağanlar.
"Mesele şunda ki, bu cezahaneniñ iç tertibi beş kere namaz qılmağa izin bermey. Ve aslında bu tertipke itiraz bildirmek kerek. Amma, kerçekten de, er birimiz öz diniy merasimlerimizge qol tutmaq aqqına malikmiz. Bu vaqıt içinde o, qaç kere ŞİZO-da oturıp çıqqanını endi hatırlap olamayım. Remzi buña açuvlana, biz de, çünki dua cinayet degil, dep eminmiz", — dep qayd etti Bekirovnıñ soy-sopu.
Remzi Bekirov — Qırım sakinlerine qarşı siyasiy sebeplerden açılğan davalar boyunca tintüvler ve mahkemelerniñ yayınlarını alıp barğan cemaat jurnalisti, şu cümleden qırımtatar milliy areketiniñ veteranı Veciye Kaşkanıñ davası, Ukrayin pravoslav kilsesiniñ papazı Klimentniñ tutuluvı, "Qırım musulmanlarınıñ davası" ve ilâhre. Remzi Bekirov qırımlı siyasiy mabüslerniñ qorantalarına yardım etmek ğayesiniñ teşebbüsçisidir. Onıñ çağına yetmegen üç balası bar.
2019 senesi saban ayında Rusiye quvetçileri Qırımda qırımtatar faalleriniñ, hususan "Qırım birdemligi" cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi saban ayınıñ 27-nde ve 28-nde Aqmescitteki Rusiye makemesi tutulğanlarnı apiske aldı.
"Memorial" aq qorçalayıcı merkezi 2019 senesi saban ayınıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Aq qorçalayıcı teşkilâtlar Remzi Bekirovnıñ koloniyadaki sert tutuv şaraitleri sebebinden azat etilmesine irişmege çağıra.