Rusiye kontrolindeki Qırımnıñ Yuqarı mahkemesi 53 yaşında yerli sakinni devlet hainligi davası boyunca 17 yıl sert rejimli koloniyada qalmasına üküm etti.
Tahqiqat versiyasına köre, qabaatlanğan kişi Rusiyeniñ Ukrayinağa istilâsına qarşı çıqqan ve Ukrayina arbiy istihbaratınen bağlanğan eken.
Qabaatlanğan kişi fortifikatsion inşaatlar, askerler, arbiy tehnika ve Rusiye ordusınıñ bölük yerleri aqqında malümatnı toplap bergen, dep israr etti qabaatlanğan kişi.
Davanıñ başqa tafsilâtları yoq, devlet hainligi davaları qapalı şekilde baqıla ve gizli ola.
2024 senesiniñ soñunda «Pervıy otdel» leyhası Rusiyede Ukrayinağa büyük istilâdan soñ 792 insan devlet hainligi, casuslıq ve çetel devletlerinen gizli işbirligi davalarınıñ mabüsleri oldı, dep saydı. Aq qorçalayıcılar bir çoq dava FSB provokatsiyalarınen bağlı edi, olarnıñ qurbanı cenkke qarşı saifelerde ve muhalifet saifelerinde olğan içtimaiy ağlarnıñ qullanıcıları ola, dep tüşüne.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.