"Diversiya azırlağanında" qabaatlanıp Qırımda mahküm etilgen ukrayinalı Gennadiy Limeşko 8 yıl apis cezasından soñ kiçik ayda azatlıqqa çıqacaq edi, amma Rusiye Federatsiyasınıñ Rostov vilâyetindeki ecnebiylerni vaqtınca tutuv Merkezinde tutulğan soñ ğayıp oldı. Saban ayınıñ 13-nden başlap onıñnen bağ bütünley yoq oldı, resmiy müessiselerge berilgen bütün muracaatlar neticesiz qaldı, dep bildirdi onıñ apayı İrina Limeşko Qırımtatar resurs merkezine.
Qayd etilgenine köre, yaqında Limeshkonıñ adı Rosfinmonitoring saytında "terrorist ve ekstremistler" cedvelinde peyda olğan. Uquq qoruyıcılar qayd etkenine köre, bu, ukrayinalınıñ taqdiri ile bağlı qasevetni arttıra, hususan apis müddeti bitkenini köz ögüne alsaq.
Onıñ apayı, şimdilik resmiy tasdıq olmasa da, aqayına qarşı yañı dava açılmasınıñ mümkünligini tüşüne.
Limeşkonıñ vaziyetini ukraнin pasportında yañartılğan fotoresimniñ olmaması zorlaştıra, bu ise vesiqanı aqiqiy olmağanına çevire.
"Bu, Rusiye Federatsiyasında faal qullanılğan sistemalı bir meseledir: apis müddeti devamında 25 ya da 45 yaşını toldurğan ve vesiqanı yañartmağa imkânı olmağan şahısnıñ pasportı lâğu etile. Böylece Rusiye Federatsiyası evge qaytmağa imkân bermey. Bu ameliyat Rusiye Federatsiyasınıñ repressiv sistemasına insanlarnı resmiy azat etilgen soñ bile qanunsız sürette izolâtsiya altında tutmağa imkân bere", — dep aytıla bildirmede.
2017 senesi saban ayınıñ 12-nde Rusiye FSBsi işğal etilgen Qırımda "SBU agenti" dep adlandırılğan ve yarımadada diversiya azırlağanında qabaatlanğan erkek tutulğanı aqqında bildirgen edi. Daa soñra Rusiye mahsus hızmetleri aqaynıñ tutuluvı ve sorğuğa çekilgen videosını derc etti. O, kamerağa özüni 1992 senesi doğğan Gennadiy Limeşko olaraq tanıttı ve işğal etilgen Qırım territoriyasında diversiya azırlağanını itiraf etti.