İşğal etilgen Qırımda FSB hadimleri Niyara Ersmambetovanı tuttı – qadın İçki rayonınıñ aphanesinde çalışa. Bu aqta «Tribunal.Krımskiy epizod» «Irade» teşebbüsiniñ malümatına esaslanıp haber ete.
Aq qorçalayıcılarnıñ malümatına köre, Ersmambetova mayısnıñ soñunda apiske alında ve eñ az eki buçuq ay Aqmescitteki SİZO-1-de tutula. Onı «devlet hainliginde» qabaatlaylar (Rusiye Federatsiyası Ceza kodeksiniñ 275-inci maddesi) – işğal etilgen topraqta tirenüv areketlerinden birine yanıcı-mazlayıcı madde anbarı aqqında malümat bergen eken. Tahqiqat versiyasına köre, bu malümat darbe endirmek içün qullanıla bile.
Tutulğan qadınnıñ eki çağına yetmegen balası bar, şimdi olarnı esli-başlı babası baqa.
Bu Qırımda soñki yarım yılda devlet hainligi ya da diversiya azırlığı qabaatlavınen eñ az 30-ıncı adise, dep qayd ete «Tribunal.Krımskiy epizod».
Aq qorçalayıcılar qayd etkenine köre, kütleviy tutuv, qapalı mahkeme, advokatlarğa sıñırlı erişüv ve işkence, böyle qabaatlavlarnıñ sebepleri ciddiy şübheler doğura. Ersmambetovanıñ davasında aq qorçalayıcılar azatlıqtan qanunsız marum etüvni köre, bu da cenk cinayeti olaraq tasnif etile.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
