Qırımtatar asıllı yırcı Jamala Grammy mukâfatını bergen Amerikanıñ Ses qaydı akademiyasınıñ azası oldı. Yırcınıñ türkülerini mukâfatqa bermege ve rey berüvde iştirak etmege aqqı bar, dep haber etti artist Instagramda.
«Ne içün bu menim içün o qadar müim? Çünki bu adiy bir titul degil. Bu – zenaat küçüniñ tanılması. Bu – tek populârlıq degil, keyfiyetni de belgilegen toplulıqqa erişüv. Bu – zemaneviy muzıkasınıñ tarihını şekillendirüv imkânı. Sesli ola, amma kerçekten böyle. Ve hususan – ukrayin muzıkası alâ daa az eşitilgen yerde onıñ sesi olmaq imkânı», – dep yazdı yırcı.
Jamala – akademiya erkânında ilk ukrayin artisti degil. 2024 senesi anda Jerry Heil qoşulğan edi.
Jamala – Qırımtatar asıllı ukrayin yırcısı ve yır müellifidir. «Eurovision-2016» yarışında qırımtatar sürgünligine bağışlanğan yırnen ğalebe qazanıp, halqara seviyede meşur oldı. Bu yır rezonans çıqarıp, Qırımnıñ Rusiye işğali vaziyetinde siyasiy fikir bildirüv olaraq köründi.
Bıltır dekabr ayında ukrayin yırcısınıñ Qırım albomındaki Arafat dağından yırınıñ klipi Megogo Music Awards versiyasına köre «yılnıñ klipi» mukâfatını aldı.
Jamala 2024 senesi Taras Şevçenko Milliy mukâfatınıñ laureatı oldı. Yırcığa Qırım folklor albomı içün mukâfat berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
