ABD prezidenti Donald Trump Ukrayinağa «Patriot» zenit-raketa kompleksleri yañıdan berilecek, dep ilân etti. Onıñ aytqanına köre, parası Avropa Birligi tarafından berilecek. Bunı Reuters agentligi bildire.
Trump aytqanına köre, kompleksler Ukrayinağa özüni qoruması içün kerek. «Putin yahşı ayta, amma aqşam er kesni bombalay», – dedi o, Washington civarındaki arbiy bazada jurnalistler ögünde çıqışta bulunıp. O, qaç kompleks berilecegini aytmadı.
Bugün Trumpnıñ Ukrayinadaki cenk aqqında evelden ilân etken «müim beyanatı» beklenile. Axios haber etkenine köre, ABD prezidenti Kyivge yañı silânıñ, hususan uzun mesafeli raketalarnıñ büyük berilüvini ilân etecek.
Neşir subetdeşleriniñ malümatına köre, Kyivge berilecek arbiy yardımnıñ yañı paketine Rusiye terenine, şu cümleden Moskvağa yetebilecek raketalar kire bile. Resmiy şekilde bunı tasdıqlamadılar.
İyülniñ 14-ne keçer gecesi Rusiye Ukrayinağa 136 uçucısıznen ücüm etti, dep bildirdi Ukrayina ordusı. 28-i nişanlarına yetti. Bundan ğayrı, ücümde bir qaç raketa iştirak etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
