Rusiye uquq qoruyıcıları Qırımda Rusiye Federatsiyası Mudafaa nazirliginiñ üyken zabitlerinden birini patlatmağa planlaştırğan qadınnı tutqan, dep bildirdi.
Berilgen malümatqa köre, 2000 senesi doğma Rusiye ve Ukrayina vatandaşı Ukrayina telükesizlik hızmeti tarafından maşina patlatıluvı içün celp etildi. «Teraktnı» 2025 senesi mayısnıñ 9-nda kerçekleştirmege planlaştırğan eken – qadın «ğarpta yapılğan patlayıcı cihaznı» qullanmaq kerek edi.
«Terakt yapacaq kişi tutuldı, ğarpta yapılğan patlayıcı cihaz parçaları alındı», – dep aytıla haberde.
Rusiye kontrolindeki Aqyar Lenin rayon mahkemesi qadınnı eki ayğa apiske aldı. Oña qarşı Rusiye Ceza kodeksiniñ 205-inci maddesi (terror ücümi) ve 275-inci maddesine (devlet hainligi) istinaden cinaiy dava açıldı.
Rusiye kütleviy haber vastaları tutulğan qadınnıñ sorğu videosını da derc ete. Anda o, Rusiye uquq qoruyıcıları aytqalarını tekrarlay. Lâkin muarririyet videoda aytılğanlarnı ve sorğudaki allarnı teşkerip olamay.
Ukrayina tarafı bu beyanatnı izaatlamadı.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
